མདུན་ངོས་སུ་བསྐྱོད། |   ཉར་ཚགས་བྱེད། |   མདུན་ངོས་སུ་བཀོད། |  རྒྱ་ཡིག་གི་དྲ་ངོས།

༄༅།།བཀའ་འགྱུར་ནང་གི་མཁའ་འགྲོ་མ་མེ་ལྕེ་འབར་བའི་རྒྱུད་ལེའུ་དང་པོ་གླེང་གཞི།

ཡོང་ཁུངས།   དྲ་རྒྱ་ལས་བཏུས།     སྤེལ་དུས།  2020-05-07 09:43:12         ཀློག་ཐེངས།  
ཡིག་གཟུགས་ཇེ་ཆེར་གཏོང་། ཡིག་གཟུགས་ཇེ་ཆུང་གཏོང་།

༄༅།།དཔལ་ཕྱག་ན་རྡོ་རྗེ་བཀའ་སྩལ་པ།བརྒྱ་བྱིན་ལ་སོགས་པ་ཁྱེད་རྣམས་ཀྱིས།རྡོ་རྗེ་མཁའ་འགྲོ་མའི་དངོས་གྲུབ་འབྱུང་བའི་རྒྱུད་ཆེན་པོ་ཞུ་བ་ཞུས་པ་ལེགས་སོ་ལེགས་སོ།།ཁྱེད་ཀྱང་རབ་ཏུ་ཉོན་ལ་ཡིད་ལ་བཟུང་ཅིག།དེས་རྣམ་པར་ཕྱེ་བ་བསྟན་པར་བྱའོ།།སྔོན་འདོད་པའི་ཁམས་འདི་ཉིད་ན།རི་རབ་ཀྱི་རྩེ་བྱང་ཤར་གྱི་མཚམས།ཤིང་ཡོངས་འདུ་ས་རྟོལ་ཞེས་བྱ་བ།རྩེ་མོ་ན་བྱ་ཁྱུང་ག་རུ་ཌ་གནས་པ།ལོ་མ་ལ་འདོད་པའི་ཡོན་ཏན་ལྔ་རང་འབྱུང་བ།འབྲས་བུ་ལ་རིན་པོ་ཆེ་སྣ་བདུན་ལོ་ཏོག་ལྟར་སྨིན་པ།།ཡལ་གི་རྩེ་གཡུའི་ཟེ་བའི་བར་བར་ན།ལྷ་དང་ལྷ་མོ་དང་།གཟའ་དང་སྐར་མ་དང་།ཉི་མ་དང་ཟླ་བའི་ཚོགས་ཀྱིས་བརྒྱན་པ།རྩ་བའི་ངོས་ལ་ཁྲུས་ཀྱི་རྫིང་བུ་བདུན་ལ།རེ་རེ་ལ་ཤིང་རྟ་རེ་རེ།ཤིང་རྟ་རེ་རེ་ལ་བུ་མོ་བདུན་བདུན་བུ་མོ་རེ་རེ་ལ་གཡོག་མོ་བདུན་བདུན།གཡོག་མོ་རེ་རེ་ལ་རྨ་བྱ་བདུན་བདུན་ཡོད་དོ་ཤིང་རྟ་དེའི་ས་ཕྱོགས་ན།སྨན་གྱི་རྣམ་པ་སྣ་ཚོགས་དང་།ལོ་ཏོག་གི་རིགས་ཁྲི་ཕྲག་བཞི་རང་སྐྱེ་བ་ཙནྡན་དང་།ག་བུར་དང་།གོ་ཤཱིརྵདང་།སྦྲུལ་གྱི་སྙིང་པོ་རྫིང་བུ་ལྔ་བརྒྱས་བསྐོར་ཏེ།དེ་ལྟ་བུའི་ཤིང་དེ་ཐུན་མོང་གི་བསོད་ནམས་ཀྱིས་སྐྱེས་སོ།།དེའི་དུས་ལ་འདོད་པའི་ཤིང་དེ་ནི་ལྷ་རྣམས་ཀྱིས་དབང་བྱེད་པའི་ཚེ།རི་རབ་ཀྱི་རྩ་བ་ན་འོད་མི་སྣང་བ་ཞེས་བྱ་བའི་གནས་ན།ལྷ་མ་ཡིན་གྱི་རྒྱལ་པོ་སུམ་བརྩེགས་དང་།ཐག་ཟངས་རིས་དང་།ཧེ་རནྣ་ཀེ་ཤུན་དང་།རྣམ་པར་སྣང་བྱེད་དང་།རབ་སིམ་དང་།སྒྲ་གཅན་འཛིན་ལ་སོགས་པ་བྱེ་བ་དུང་ཕྱུར་ཙམ།ཤིན་ཏུ་མི་སྡུག་པའི་ཆ་བྱད་དུ་བྱས་ནས།རབ་ཏུ་རྔམ་པའི་ང་རོ་དང་།འཇིགས་ཤིང་སྐྲག་པའི་མཚོན་ཆ་ཐོག་ནས།རི་རབ་ཀྱི་ཁ་ཆོས་བཟངས་ཞེས་བྱ་བར་ལྷགས་སོ།།དེ་ནས་རི་རབ་ཀྱི་ཁ་ལ་ལྷ་བ་སུ་དེ་བ་དང་།ལྷ་མ་ཧཱ་དེ་བ་དང་།བརྒྱ་བྱིན་ཉིད་ལ་སོགས་པ།ལྷ་བྱེ་བ་དུང་ཕྱུར་ལ་ལྷ་མ་ཡིན་རྣམས་ཀྱིས་འདི་སྐད་ཅེས་སྨྲས་སོ།།རི་རབ་རྩེ་གནས་སུམ་བཅུ་རྩ་གསུམ་ལྷ།།ཤིང་འདིའི་ལྷ་དང་ལྷ་མིན་ཐུན་མོང་ལས།།ད་ལྟ་འདོད་པའི་ཁྱེད་ཅག་ལྷ་དབང་ན།།ད་ནི་ངེད་ཅག་ལྷ་མིན་བདུད་ལ་བླང་།།ཞེས་སྨྲས་པ་དང་།ལྷ་རྣམས་ཀྱིས་སླར་སྨྲས་པ།དཔག་བསམ་ཤིང་ལ་འདོད་ཡོན་བསམ་ཡས་ཀྱང་།།བསོད་ནམས་དབང་གིས་ལྷ་ལ་ཡོངས་སུ་གྲུབ།།གཞན་ལ་ཡོད་ན་སྐམས་ཤིང་མེད་པར་འགྱུར།།དེ་བས་ཁྱེད་ལ་ལྗོན་ཤིང་ངེད་མི་སྟེར།།ཞེས་སྨྲས་པ་དང་།སླར་ལྷ་ལ་སྨྲས་པ།ཐུན་མོངས་ལས་གྲུབ་བདེ་ལྡན་ལྗོན་པའི་ཤིང་།།ལྷ་ཡིས་དབང་བྱས་ངེད་ལ་མི་སྟེར་ན།།འཇིག་རྟེན་སྲེག་པའི་མཚོན་གྱི་ཆར་ཕབ་ལ།།ལྷ་དང་ལྷ་མིན་གཡུལ་ཆེན་འགྱེད་ཅེས་ཟེར།།ཅེས་སྨྲས་ཏེ།སླར་ཡང་སོང་ནས་ལྷ་མ་ཡིན་གྱིས་དམག་དྲངས་སོ།།གླང་པོ་ཆེས་སྲུངས་ཀྱི་མགོ་སུམ་བཅུ་རྩ་གཉིས་ལ་གནོད་སྦྱིན་སུམ་བཅུ་རྩ་གཉིས་ཞོན་ཏེ།དབུས་ཀྱི་མགོ་ལ་དབང་པོ་ཐག་ཟངས་རིས་ཞོན་ཏེ།གླང་པོ་ཆེའི་སྣ་ལ་ཀ་མ་ལ་ནག་པོ་བཏགས་ཏེ།ལྷ་མ་ཡིན་གྱི་དམག་བྱེ་བ་དུང་ཕྱུར་གྱིས་བསྐོར་ཏེ།རྫུ་འཕྲུལ་གྱི་ནམ་མཁའ་ལ་མཚོན་གྱི་ཆར་ཆེན་པོ་མེ་ལྕེ་འབར་བ་འདྲ་བའི་ཆར་འབེབས་ཏེ་དམག་དྲངས་སོ།།དེ་ནས་ཆོས་བཟང་ཞེས་བྱ་བའི་གདན་སར་ལྷ་རྣམས་འཚོགས་ཏེ།འཐབ་པར་བརྩམས་པ་དང་།དང་པོ་ལྷ་རྣམས་ཀྱིས་ཁྲོ་མ་ཤེས་ནས་རྩུབ་འགྱུར་གྱི་ཁང་པ་ན།ཁྲོ་བོ་ལངྐ་ནག་པོ་ཁྲོས་པའི་ཁ་ཆུ་ཁྲོ་ཆུའི་རྫིང་བུ་བདུན་འཁྱིལ་བ་ལས་འཐུངས་སོ།།དེར་ལྷ་རྣམས་ཞེ་སྡང་སྐྱེས་ཏེ་ཤིན་ཏུ་ཁྲོ་བར་གྱུར་ནས།བཟོའི་ལྷ་བི་ཤོ་ཀར་མས་ནུབ་གཅིག་ལ་གསེར་ཁྲབ་བྱེ་བ་ཕྲག་དགུ་འབུམ་རང་བརྡུངས་སོ།།ལྷ་མ་ཧཱ་ཀྲོ་དྷས་ནུག་གཅིག་ལ་མཚོན་རལ་གྲི་དང་།འཁོར་ལོ་དང་།ཐོད་པ་དང་།ལྕགས་ཀྱུ་དང་།དགྲ་སྟ་དང་།མདུང་རྩེ་གསུམ་པ་བྱེ་བ་ཕྲག་དགུ་ཁྲི་དགུ་འབུམ་རང་བརྡུངས་སོ།།དུས་དེ་ཙམ་ན་ལྷ་རྣམས་གོ་མཚོན་ཐོགས་ཏེ།གླང་པོ་ཆེ་རབ་ཏུ་བརྟན་པའི་མགོ་སུམ་བཅུ་རྩ་གཉིས་ལ་ཉེ་དབང་སུམ་བཅུ་རྩ་གཉིས་ཞོན།དབུས་ཀྱི་མགོ་བོ་ལ་ལྷའི་དབང་པོ་བརྒྱ་བྱིན་ཞོན།ལྷ་དམག་བྱེ་བ་དུང་ཕྱུར་གྱིས་མཐའ་བརྟེན་ཏེ།གླང་པོ་ཆེའི་སྣ་ལ་རལ་གྲི་བཏགས་ནས་ལྷ་དང་ལྷ་མ་ཡིན་གཉིས་གཡུལ་བཀྱེའོ།།དུས་དེ་ཙམ་ན་ལྷས་མཚོན་རྒྱབ་པ་རྣམས་ནི།ཁྲག་གར་ཕོག་པ་ལ་བདུད་ཀྱི་དམག་མི་ཁྲི་ཁྲི་ཙམ་དུ་འཕེལ་ལོ།།ལྷ་མ་ཡིན་གྱིས་མཚོན་བརྒྱབ་པ་ལ་ནི་ཁྲག་ལ་དམག་མ་འཕེལ་བར་ཤིའོ།།དེར་ལྷ་ཐམས་ཅད་གཏིང་འཕམ་སྟེ།ལྷ་མ་ཡིན་རབ་ཏུ་རྒྱལ་བའི་དུས་སུ།ཕྱག་ན་རྡོ་རྗེ་ཉིད་ཀྱིས་ལྷ་རྣམས་རྒྱལ་བར་བྱ་བའི་ཕྱིར།དཔལ་བེའུ་དབུས་ནས་ཧཱུྃ་མཐིང་ནག་འབར་བ་གཅིག་སྤྲུལ་ཏེ།ལྷ་བིཥྞུ་རཱ་ཛའི་དཔལ་བེའུ་དབྱིངས་སུ་ལྕགས་ཀྱི་འཛེར་བ་ཅིག་ཏུ་གྱུར་ཏོ།།མཛེར་པ་གཏོལ་བའི་ནང་ནས་བུད་མེད་སྔོན་མོ་དབུ་སྐྲ་བཻ་ཌཱུརྱའི་ཆུན་འཕྱངས་ཅན།མིག་ཨུཏྤ་ལའི་འདབ་མ་འདྲ་བ།མཚན་དང་དཔེ་བྱད་དུ་ལྡན་པ་ཅིག་བྱུང་ངོ་།།དེ་ལ་ལྷ་རྣམས་ཀྱིས་མིང་བཏགས་པ།ལྷ་མོ་ཨུ་མཱ་དེ་བཱ་བྱ་བར་བཏགས།ལྷའི་བུ་མོ་དེ་ཀུན་གྱི་ཆུང་མར་འདོད་པ་ལ།ནམ་མཁའ་ལ་ཕྱག་ན་རྡོ་རྗེས་ངའི་སྤྲུལ་པའི་ཚིགས་བཅད་འདི་བསྒྲགས་སོ།།ལྷའི་རྒྱལ་སྲིད་མཐོ་ཞིང་བརྟན་པ་དང་།།རིས་དྲུག་སེམས་ཅན་དགེ་ལ་དགོད་པ་དང་།།ལྷ་མིན་བདུད་ཀྱི་གཡུལ་ཆེན་བཟློག་པའི་ཕྱིར།།དབང་ཕྱུག་ལྷ་ལ་ཨུ་མཱ་ཆུང་མར་བྱིན།།ཞེས་བསྒྲགས་སོ།།དུས་དེའི་ཚེ་ན་འཛམ་བུའི་གླིང་གི་ནུབ་བྱང་མཚམས།ཡཀྵ་ཀ་མ་ལ་འབར་བའི་དུར་ཁྲོད་ན།ལྷ་མ་ཧཱ་དེ་བ་དགེ་སློང་གི་ཆ་ལུགས་སུ་འགོག་པའི་བརྟུལ་ཞུགས་དྲག་པོ་ལ་ཞུགས་པའི་དྲུང་དུ་ཨུ་མཱ་དེ་བཱ་ཁྲིད་ནས་ཞག་བདུན་ཕྲག་བདུན་དྲོད་ལ་བཙས་པས།འདོད་པའི་འཁྲིག་པ་སྤྱད་དོ།།འཁྲིག་པ་སྤྱད་པའི་དབང་གིས་བར་སྣང་ལ་གཟའ་དང་སྐར་མ་བྱུང་ངོ་།།དེར་ལྷ་མོ་ཨུ་མཱ་དེ་ལ་བུ་ཚ་མིང་སྲིང་གཉིས་སྐྱེས་སོ།།མིང་པོ་ནི་གཤིན་རྗེ་མ་ཧཱ་ཀཱ་ལ་ཞེས་གྲགས་སོ།།སྲིང་མོ་ནི་ལྷ་མོ་དམར་མོ་ཙ་མུཎྜི་ཞེས་བྱ་བར་གྲགས་སོ།།གཤིན་རྗེ་མིང་སྲིང་དེ་གཉིས་ཆོས་བཟང་ལྷའི་མདུན་སར་ཁྲིད་ནས་ཕྱིན་ཏོ།།དེ་ནས་ཕྱག་ན་རྡོ་རྗེ་ཉིད་ཀྱིས།གཤིན་རྗེའི་མིང་སྲིང་ལ།མ་ཧཱ་ཡཀྵ་བདུད་ལས་རྣམ་པར་རྒྱལ་བའི་དབང་བསྐུར་ཏེ།སྔར་བཞིན་དུ་ལྷ་དང་ལྷ་མ་ཡིན་གཉིས་གཡུལ་ཆེན་པོ་བཀྱེའོ།།དེ་ནས་གཤིན་རྗེ་མ་ཧཱ་ཀཱ་ལས།ལག་ན་གསལ་ཤིང་རི་རབ་ཙམ་གཅིག་གིས།ལྷ་མ་ཡིན་གྱི་གཡུལ་ངོར་དྲིལ་བས་གཡུལ་བཟློག་གོ།ཙ་མུཎྜིའི་རལ་གྲི་མེ་ལྕེ་ཕྲེང་བ་ཞེས་བྱ་བས།ལྷ་མ་ཡིན་ཧེ་ར་ཎ་ཀེ་ཤུའི་མགོ་བཅད་དོ།།དེ་ནས་ལྷ་དམག་མང་པོས་ཀྱང་ལྷ་མ་ཡིན་ལ་མཚོན་ཆའི་ཆར་ཕབ་ནས།ཁྲག་རྣམས་དམག་མིར་སྤྲུལ་པ་འདྲ་སྟེ།ལྷ་མོ་ཙ་མུཎྜིས་ཧེ་ར་ཎ་ཀེ་ཤུའི་ཐོད་པས།ཁྲག་བཅུས་ཤིང་རོལ་པས་འཕེལ་མ་ནུས་པར་བྱེད་ཀྱིན་མཚོན་གྱི་ཆར་ཕབ་ནས།ཙ་མུཎྜིའི་ལྟེ་བ་ལ་ལྷ་བྱེ་བ་དུང་ཕྱུར་རྣམས་ཀྱི་རྫོང་བྱས་པས་འཐབས་སོ།།ལྷ་དམག་དཀར་པོ་རྒྱལ་བར་བྱས་ཤིང་དཔག་བསམ་ཤིང་གི་མངའ་བདག་ཏུ་གྱུར་ཏེ།རྣམ་པར་རྒྱལ་བའི་ཁང་གཟངས་ཡང་རང་བྱུང་དུ་ཡོད་དོ།།ལྷ་མ་ཡིན་འཕམ་པར་གྱུར་ཏོ།།བརྒྱ་བྱིན་ཉོན་ཅིག།དེ་ནས་ལྷའི་བུ་མོ་ཙ་མུཎྜི་དེས།རི་ཁྲོད་ཆེན་པོ་མདངས་དགའ་ཞེས་བྱ་བར།ཤིང་རི་ཁྲོད་ཞེས་བྱ་བའི་ལོ་མ་གྱོན་ནས།ལོ་བདུན་དུ་འཕགས་པ་མི་ཕམ་པའི་གཟུངས་བཟླས་པས།ལྷ་མོ་པརྞྞ་ཤ་བ་རི་རི་ཁྲོད་ལོ་མ་ཅན་ཞེས་བྱ་བར་གྱུར་ཏོ།།དེ་ནས་ལྷ་མོ་དེས་གླུ་དུང་གི་མཛེར་པ་ཅན་ཞེས་བྱ་བའི་བྱང་ཆུབ་སེམས་དཔའ་དེ་བྱ་ཁྱུང་ཀ་རུ་ཎ་ཞེས།ལྷ་མོ་པརྞྞ་ཤ་བ་རི་དེས་བྱ་ཁྱུང་བརྟུལ་བས་ཀླུ་བསྐྱངས་ཏེ།ལྷ་མོ་དཀར་མོ་དུང་སྐྱོང་མ་ཞེས་བྱ་བར་གྱུར་ཏོ།།ལྷ་མོ་དུང་སྐྱོང་མ་དེ་ནི་རི་རབ་རྩེ་མོ་རྣམ་པར་རྒྱལ་བའི་ཁང་བཟངས་རྩེ།བྱང་ཤར་གྱི་མཚམས་བྱང་ཆུབ་ཀྱི་ཤིང་དྲུང་ན།རིན་པོ་ཆེའི་ཁང་པ་བདུན་བརྩེགས་ཀྱི་གཞལ་ཡས་ཀྱི་ཁང་ན།རིན་པོ་ཆེའི་ཁྲི་སྟེངས་ན།གསེར་དངུལ་བཻ་ཌཱུརྱའི་དབུ་རྒྱན་དང་མགུར་ཆུས་བརྒྱན་ཏེ།ལུས་འགྱིང་བག་ཏུ་བཞུགས་སོ།།ལྷའི་བུ་དང་བུ་མོ་མང་པོས་ཀྱང་ལོངས་སྤྱོད་དང་།གླུ་དང་དབྱངས་དང་།རོལ་མོ་བསམ་གྱིས་མི་ཁྱབ་པའི་མཆོད་པ་བྱེད་དོ།།wiaརྗེ་ཙོང་ཁ་པའི་དྲ་བ།

༼  ༢  ༽དེ་ནས་ལྷ་མོ་ཡང་ཁོ་མོ་དེ་ལ་དགྱེས་ནས་གཅེས་པར་བྱེད་དེ།དེའི་ཚེ་དེའི་དུས་ན་ཡུལ་ལངྐ་ཀ་པུ་རི་རུ།སྤྲེའུ་འབལ་ལེ་དང་མགྲིན་བཟངས་འཐབས་པ་ལ་ལྷ་ཐབས་ཅད་ལྟད་མོ་ལ་འགྲོ་བས།ལྷ་མོ་ཨུ་མཱས་བུ་མོ་དུང་སྐྱོང་མ་ལ་འདི་སྐད་ཅེས་སྨྲས་སོ།།དེ་རིང་ཁྱོད་ཀྱི་གན་དུ་སུ་འོངས་པས་ཁྱོད་བསླུ་སྟེ་འོང་བས།དེ་ལ་མ་ལྟ་ཅིག་ཅེས་བསྟན་ཙམ་ན།ཁོལ་མོས་སྐབས་དེར་ད་ཤ་གྲཱི་བ་ལ་སྦྲན་ནོ།།དེར་སྲིན་པོ་ད་ཤ་གྲཱི་བས།སྲིན་གྱི་བོང་བུ་དམར་གྭ་ལ་ཞོན་ནས།ལྷ་མོའི་ཕོ་བྲང་སྒོར་ཕྱིན་ཏེ་སྲིན་པོ་ཁོ་བདག་ནི་མིའི་ཆ་བྱད་ལ་ཤིན་ཏུ་གཟུགས་བཟང་ལ་མཛེས་པ་གཅིག་ཏུ་སྤྲུལ།བོང་བུ་ནི་རི་དགས་གྭ་དོར་སྨུག་པོ་ཅིག་ཏུ་སྤྲུལ་ཏེ།ལྷ་མོ་དུང་སྐྱོང་མའི་སྤྱན་སྔར་ཕྱིན་ནས།རོལ་མོའི་སིལ་སྙན་དང་གླུ་དབྱངས་སྣ་ཚོགས་བྱས་པས་བསླུས་སོ།།ལྷ་མོ་རོལ་མོ་ལ་དགའ་བས་འཛུམ་ཅིག་ཤོར་རོ།།དེ་ནས་སྲིན་པོས་གླགས་རྙེད་དེ།ལྕགས་ཀྱི་ལྷམ་སྒྲོག་སྔོན་པོ་བཀྲོལ་ནས་བཟུང་སྟེ་གླུ་འདི་སྐད་བླངས་སོ།།ཀྱེ་ཡོངས་འདུ་ཤིང་གི་གནས་མཆོག་ན།།རིན་ཆེན་མཛེས་པའི་ཕོ་བྲང་ནས།།བདེ་ལྡན་འཕྲུལ་གྱི་ལྡིང་ཁང་ན།།འགྱིང་བག་ཚུལ་དུ་གར་མཛད་པ།།དབང་ཕྱུག་སྲས་མོ་མ་ལགས་སམ།།དགའ་བྱེད་དུང་སྐྱོང་མ་ལགས་སམ།།ལྷ་མོ་མང་པོའི་ཚོགས་དང་རོལ།།དབུའི་སྙན་ཆ་གདུབ་འཁོར་ནི།།རིན་ཆེན་མཛེས་པས་ཀུན་ནས་སྤྲས།།སྤྱན་ནི་ཨུཏྤ་ལ་འདབ་མ་འདྲ།།ཤངས་ནི་བིལ་བའི་འབྲས་བུ་འདྲ།།ཞལ་ནས་ཨུཏྤལ་ངད་ཀྱང་བྲོ།།སྐུ་ནི་འཁྲིལ་ལྡེམ་གཞོན་ཚུལ་འདྲ།།གསུང་ནི་ཚངས་པའི་དབྱངས་སྙན་མཆོག།ནུ་འབུར་སྟོད་སྨད་ཕྱེད་པས་འགྱིང་།།ཁྱོད་འདྲའི་སྐུ་ནི་གཞན་ན་དཀོན།།ལྷའི་ལོངས་སྤྱོད་མཛེས་པས་མི་བྲེལ་ཡང་།།ཞབས་ཀྱི་ཆས་སུ་ལྕགས་སྒྲོག་འདི་འབུལ་ཞེས།།ཅི་མཛད་ཅི་སྡུག་ཅི་ཡང་གསུང་བ་སྙན།།ཁམས་གསུམ་དག་ན་ཁྱོད་འདྲ་ཤིན་ཏུ་དཀོན།།སེམས་ཅན་ཀུན་གྱིས་ལྟ་བས་མི་ངོམས་ཁྱོད།།བདག་གིས་དབུལ་འདི་བཞེས་པར་གནང་བར་མཛོད།།ཅེས་ཕུལ་བ་ལ།ལྷ་མོས་ལྕགས་སྒྲོག་བླངས་སོ།།དེ་ནས་རང་གི་རྐང་པ་གཡས་པ་ལ་དཀྲིས་ཏེ་རྒྱན་བྱས་སོ།།དེ་ནས་ཁོལ་མོ་དེས།ཇོ་མོ་དུང་སྐྱོང་མ་ལ་ཞུས་པ།ཀྱེ་ཇོ་མོ་བདེ་མཆོག་དུང་སྐྱོང་མ།བདག་ཞུ་བ་གཅིག་མཆིས་ན་གནང་ངམ་བྱས་པ་ལ།ཇོ་མོ་ན་རེ་ཁྱོད་གློ་བ་ཉེ་བས་ཅི་ཞུས་པ་གནང་ངོ་ཟེར་རོ།།དེ་ནས་ལྷ་ནི་ངག་བདེན་པའི་སྡོམ་པ་ཡོད་པས།ཇི་སྐད་སྨྲས་པ་ལྟར་བྱེད་པ་ཡིན་ནོ།།དེ་ནས་ཁོལ་མོས་གསོལ་པ།ཀྱེ་བདག་གི་ཡུན་གྱི་རྗེར་གྱུར་དུང་སྐྱོང་མ།།ཁྱོད་འདྲ་འཇིག་རྟེན་གཞན་ན་མེད།།འགྲོགས་པས་ཟླ་མེད་སྐར་མ་གཅིག་ཤར་འདྲ།།དེང་འདིར་མཆིས་བས་ལྕགས་སྒྲོག་འབུལ་མཁན་དེ།།གཏན་གྱི་གྲོགས་ཟླར་མཛད་པར་ཞུ་བ་འབུལ།།བདག་ཀྱང་རྟག་ཏུ་ཁྱོད་ཀྱི་བྲན་མོ་བྱེད།།ཞེས་ཞུས་པ་ལ།ལྷ་མོ་དེས་སྔར་ཁས་བླངས་པ་དེས་མི་བྱ་བའི་དབང་མེད་ནས།ལྷ་མོ་ན་རེ་ཁྱོར་བྱའི་མི་དེ་གང་ན་འདུག།སུ་ཡིན་བྱས་པ་ལ།ཁོལ་མོས་སྨྲས་པ།དེ་ནི་བདག་གི་ཞང་པོ་སྲིན་པོ་ད་ཤ་གྲཱི་བ་ཡིན།ཡུལ་ལངྐ་པུ་ར་ན་འདུག་ཅེས་སྨྲས་པ་དང་།དེ་ནས་དུང་སྐྱོང་མ་དབང་མེད་དུ་སྲིན་པོའི་ཆུང་མར་སོང་ངོ་།།དེ་ནས་ལྷ་མོ་ཨུ་མཱས་བུ་མོ་དུང་སྐྱོང་མ་ལ་དམོད་པ་བོར་བ་ངའི་བུ་མོ་རབ་ཏུ་གཅེས་པར་བྱས་ཏེ།ལྷའི་ལོངས་སྤྱོད་མཛེས་པས་མི་བྲེལ་ཡང་།།ང་ལ་གསངས་ནས་སྲིན་པོའི་ཆུང་མར་སོང་།།ཕྱིན་ཅད་བུ་མོ་ཁྱོད་ཀྱང་སྲིན་དང་འགྲོགས།།མི་ཤ་ཟ་ཡི་ཞིང་མི་ལྤགས་གྱོན་པར་གྱུར།།སྲོག་གཅོད་བྱེད་ཅིང་མི་ཡི་ཐོད་ཁྲག་ཐོགས།།བོང་བུ་ཞོན་ལ་ལྷའི་ཁ་དོག་ཉམས།།སྲིན་གྱི་ཁ་དོག་ནག་ལ་འཇིགས་པར་ཤོག།དེ་ཡི་ཁོལ་མོ་རེ་མ་ཏི་ཁྱོད་ཀྱང་།།ང་ཡི་བུ་མོ་བསླུས་ཏེ་སྲིན་ལ་བྱིན།།ཁྱོད་ཀྱང་མི་སྡུག་འཇིགས་པའི་གདོང་དུ་གྱུར།།ཚེ་རབ་ཀུན་ཏུ་ཁྱོ་དང་མ་ཕྲད་ཅིག་ཅེས་དམོད་པ་བཅུ་གཉིས་པ་བོར་རོ།།དེ་ནས་བུ་མོ་ལ་མའི་དམོད་པས་བསྡིགས་ནས་ལྷའི་ཁ་དོག་དཀར་པོ་ཉམས་ཏེ་མཐིང་ནག་ཏུ་གྱུར།མི་ཤ་ཟ་མི་ཁྲག་འཐུང་།མི་ལྤགས་གྱོན་བོང་བུ་ཞོན།གཅེར་བུར་བུད་ནས་འདུག་གོ།བུ་ནི་སྲིན་པོ་ཕྲུ་གུ་སེང་གེ་ཟླ་དང་།མེ་ཏོག་ཅོད་པན་དང་།གངས་ཅན་དང་།མཆེ་བ་བདུན་པ་ལ་སོགས་པ་ལྔ་བརྒྱ་སྐྱེས་ཙམ་ན།ཁྱོ་སྲིན་པོ་ད་ཤ་གྲཱི་བ་ཤིའོ།།དེ་ནས་བུ་མོ་དུང་སྐྱོང་མ་ཡང་ཡུགས་སའི་ཆ་ལུགས་བྱས་ཏེ།སྐྲ་མདུན་སྐྲ་ལན་བུ་གཅིག་ལ་བླས་སོ།།བྲན་མོ་ཕུར་བའི་ལྷ་ཡང་དམོད་པ་སྡིག་པས།སྲིན་གྱི་ཕག་རྫི་བྱེད་ཙམ་ན།ཕག་རྫི་དུན་བུ་སྲིན་བྱ་བས་མོ་ལ་དབང་མེད་དུ་ཆགས་པ་སྤྱད་དོ།།དེ་ནས་ཕུར་པ་ལྷ་ཡང་ནལ་བུ་སྦྲུམ་མོ།།དེ་ནས་དཔོན་གཡོག་གཉིས་ཀྱིས་སྲིན་པོའི་བོང་བུ་བརྐུས་པ་ཞོན་ནས།ད་ཤ་གྲཱི་བའི་རལ་གྲི་སྡིག་པ་ཅན་བརྐུས་པ་གཡས་ན་ཐོགས།སྲིན་པོའི་ནོར་བུ་རིན་པོ་ཆེ་བརྐུས་ནས་ནེའུ་ལེའི་རྐྱལ་བུར་སྦས་ནས།ལག་པ་གཡོན་དུ་ཐོགས་ནས་བྲོས་སོ།།ཕྱི་ནས་སྲིན་པོའི་དམག་གིས་བསད་ཀྱིས་དོག་ནས།བོང་བུ་བསྐྱོད་ནས་ཁ་ཕྱིར་བསྟན་ཏེ།ཕྱི་ན་སྲིན་པོ་བྱ་ར་བྱེད་ཅིང་ཕྱིན་ནོ།།ཐ་མར་དུར་ཁྲོད་གཅིག་ཏུ་ཕྱིན་ན་སྐྱེས་པ་གཡུལ་དུ་བསད་པའི་རོ་གཅིག་དང་ཕྲད་དོ།།དེ་ནས་ཁོང་གཉིས་ཤ་དེ་བསྲེགས་ནས་ཟ་འདོད་པ་ལ་གཙུབ་ཤིང་མེད་ནས།རྒྱ་མཚོའི་འགྲམ་ན་རྡོ་སོལ་གྱི་རི་ལ་ཆར་བབ་ནས་མེ་འབར་བ་མཐོང་ནས་རྡོ་སོལ་མེ་བླངས་ནས་ཤ་བསྲེགས་ནས་ཟོས་སོ།།ཕྱི་ན་ཁྱི་དཀར་པོ་གཅིག་འབྲང་བ་ཡང་བསད་ནས་ཟོས་སོ།།ལྤགས་པ་ལ་རྒྱལ་མཚན་བྱས་སོ།།དེ་ནས་ཁོལ་མོ་རེ་མ་ཏི་ལ་ནལ་ཕྲུག་སྐྱེས་སོ།།ཁོང་གཉིས་ཀྱིས་ནལ་ཕུག་གི་ཤ་ཡང་ཟོས་སོ།།དེ་ནས་ཇོ་མོས་བོང་བུ་ལ་ཞོན་ཁོལ་མོས་ཁ་ཁྲིད་བྱས་ནས་རྒྱ་མཚོའི་ཁར་ཕྱིན་ནས།གཤིན་རྗེ་རླུང་གི་འཁོར་ལོ་ཅན་ཞག་བདུན་བསྒོམས་པས།རླུང་ནག་ཚུབ་མ་ནག་པོ་གཅིག་དྲུང་དེར་གྲུབ་བོ།།དེ་ནས་ལྷ་མོ་དཔོན་གཡོག་གཉིས་ཀྱིས།སྣང་སྲིད་ཀྱི་ལྷ་འདྲེ་མཐུ་བོ་ཆེ་པོས་ནས་སྨོན་ལམ་བཏབ་པ།ང་ཡང་ཚེ་འདི་འཕོས་མ་ཐག་ཏུ་གསང་སྔགས་ཀྱི་གྲུབ་པ་ཐོབ་ནས་རྒྱལ་བའི་ཞལ་མཐོང་སྟེ།འདོད་པའི་ཁམས་ཀྱི་དབང་ཕྱུག་མར་ཤོག་ཤིག།ངའི་བྲན་མོ་ཕུར་པའི་ལྷ་འདི་ཡང་དུས་ཐམས་ཅད་དུ་ངའི་འབངས་ཀ་མ་ལར་ཤོག་ཤིག།ནོར་དུ་མི་མགོ་ལ་ལོངས་སྤྱོད་པར་ཤོག་ཤིག།ཞོན་པ་བོང་བུ་ལ་བྱེད་ལ།ལག་ཆ་རལ་གྲི་ལ་བྱེད་བར་ཤོག་ཤིག་ཅེས་སྨྲས་སོ།།རྒྱ་མཚོ་སྐོར་ཞིང་རླུང་ཚུབ་མ་ལ་བཱ་ཡ་བེ་བཱ་ཡ་བེ་ཞེས་བོས་ཙམ་ན།ཚུབ་མ་བྱུང་བས་དཔོན་གཡོག་གཉིས་ཀ་རྒྱ་མཚོའི་ནང་དུ་བསྐྱུར་ཏེ་བཏང་ངོ་།།དེ་ནས་ལྷ་མོ་དུང་སྐྱོང་མ་དེས་མི་ཤ་ཟོས་པའི་མཐུ་དང་།རང་གི་སྨོན་ལམ་གྱི་དབང་གིས།རྒྱ་མཚོའི་འགྲམ་དུ་དུར་ཁྲོད་ཆེན་པོ་རོའི་ཚལ་ཞེས་བྱ་བར།གཤིན་རྗེའི་ལྷ་མཐུ་ཅན་གྱི་བུ་མོར་སྐྱེས་ཏེ།གནོད་སྦྱིན་མ་ཆེན་མོ་ལ་ཁ་དོག་མཐིང་ནག་ལ་རབ་ཏུ་འཇིགས་པ།མིག་རྩ་དམར་བ་མཆེ་བ་ཟང་ཡག་ལ་རལ་པ་ཏིང་ཟ་བང་དུ་འདུག་པ་ཅིག་ཏུ་གྱུར་ཏེ།གཤིན་རྗེ་མཱ་རུ་རྩེ་དང་སྦྱོར་བ་བྱས་པ་ལ་བུ་བདུད་ཁྲམ་ནག་པོ་བྱ་བ་བྱུང་།བོང་བུ་ཡང་དམར་གྭ་ལ་གཡུའི་རྣ་བ་ཅན་རླུང་གི་གཤོག་པ་ཅན།མིག་འཇུག་མར་ལ་ཡོད་པ་ཅིག་ཏུ་བྱུང་ནས་ནོར་སྐལ་བྱེད་དོ།།དེ་ནས་ཁོལ་མོ་རེ་མ་ཏི་རོ་ལངས་མ་འདི་ནི་སྐྱེ་བ་གང་བླངས་ཞེ་ན།རྒྱ་མཚོའི་ནང་དུ་བུད་མེད་ལུས་པོ་ཕྱེད་སྐམས་ལ་ཆུ་སྲིན་གྱི་མགོ་ཅན་གཅིག་ཏུ་སྐྱེས་ཏེ།མིང་ཡང་ཀླུ་མོ་གཞོགས་སྐམས་ཆུ་སྲིན་མགོ་ཀླུ་མོ་རེ་མ་ཏི་ཞེས་བྱ་བར་བཏགས་ནས།ཞག་དགུ་བཅུ་ན་ཚེ་འཕོས་ནས་།སྐྱེ་བ་བླངས་པ་ནི་ཡུལ་དྲི་ཟའི་གྲོང་ཁྱེར་གསེར་སྡིངས་སྐྱེད་མོས་འཚལ་ཞེས་བྱ་བ་ན།དུག་ཤིང་ནག་པོ་འགྱུར་མེད་ཀྱི་རྩ་བ་ན་བདུད་རི་ཏི་འགོང་ཉག་དང་།དྲན་པ་དབང་བྱེད་གཉིས་བྱི་བྱས་པ་ལ་ཞག་དྲུག་བཅུ་རྩ་གཅིག་ན་བུ་མོ་གཅིག་སྐྱེས་ཏེ།ཕས་ནི་སྲིད་པ་གསུམ་གྱི་བློ་འཕྲོག་མར་བཏགས།མས་མིང་བཏགས་པ་ནི་ཡ་ཚ་ན་འཕྲུལ་གྱི་གཤོག་པ་ཅན་དུ་བཏགས།བདུད་ཕོ་མོ་གཉིས་ཀྱིས་རང་གི་བུ་མོ་ལ་སྐྲ་ཉག་རེ་ལ་གསེར་དང་།བཻ་ཌཱུ་རྱའི་ཆུན་འཕྱང་དང་།རིན་པོ་ཆེའི་དབུ་རྒྱན་དང་།ཉི་ཟླའི་ཐོད་རྡེང་དང་།ཐོད་པའི་མགུར་ཆུ་དང་།སྦྲུལ་གྱི་གདུ་བུས་བརྒྱན་ཏེ།བྱི་བྱས་པའི་ནལ་ཕྲུག་ཡིན་པས།བདུད་ཀྱིས་རིན་པོ་ཆེ་སྣ་ལྔའི་ཁང་པའི་དབུས་སུ་ཐོད་པའི་གཞལ་ཡས་ཁང་བྱས།ཐོད་པའི་ནང་དུ་ཡང་ཐོད་འཕྲུལ་གྱི་ལྡིང་ཁང་གྲུབ།དེའི་ནང་དུ་ཁང་པ་བདུན་བརྩེགས་ཀྱི་བདུན་ཚོགས་ཀྱི་ནང་དུ།མི་རོ་འབུམ་གྱི་ཁྲི་སྟེངས་སུ་བུ་མོ་དེ་སུས་མ་མཐོང་སུས་ཀྱང་མ་ཚོར་བར་སྦས་ཏེ།སྒོ་སྨྲ་བོ་ལག་རིངས་དང་།ནམ་གྲུ་ཁྲབ་ཐོགས་ཀྱིས་བཅད་དོ།།བདུད་ཀྱི་དམག་གི་རྒྱལ་མོ་དང་།གླིང་བཞིའི་རྒྱལ་མོ་དང་།ས་བདག་གི་རྒྱལ་མོ་དང་།དེ་རྣམས་ཀྱིས་ཁང་པ་དེ་རབ་ཏུ་སྲུང་ཞིང་འཁོད་དོ།།བརྒྱ་བྱིན་ཉོན་ཅིག།དེའི་ཚེ་ན་ལྷ་མོ་དུང་སྐྱོང་མ་ནི།སྔོན་གྱི་ཁོལ་མོ་རེ་མ་ཏི་རོ་ལངས་མ་བདུད་ཀྱི་བུ་མོར་སྐྱེས་པ་བཀུག་ནས་ཁོལ་འདོད་པ་ལས།ཕྱག་ན་རྡོ་རྗེ་ངའི་གསང་སྔགས་བྱེ་བ་ཕྲག་བཅྭ་བརྒྱད་བཟླས་པས།གསང་སྔགས་དེའི་བྱིན་གྱི་བརླབས་ལས།མཁའ་འགྲོའི་ཏིང་ངེ་འཛིན་གྲུབ་པ་མོ།།ལག་ན་པདྨ་ཧེ་རུ་ཀ་ཐོགས་པ་གཅིག་རང་བྱུང་བས།མ་བདུད་ཀྱི་ཡུལ་དང་ཕོ་བྲང་ཀུན་བྱིན་གྱིས་བརླབས་པའི་ཚེ་ན།བདུད་ཀྱི་རྒྱལ་པོ་དང་།བློན་པོ་དང་།འཁོར་རྣམས་དྲན་པ་མེད་པར་མྱོས་པར་གྱུར་ཏོ།།བདུད་ཀྱི་བུ་མོ་རེ་མ་ཏི་དེས་སྔོན་གྱི་ཇོ་མོ་ལྷ་མོ་དུང་སྐྱོང་མ་དྲན་པས།ཡིད་ཕྱོགས་ཏེ་དུང་སྐྱོང་མའི་སྤྱན་སྔར་འགྲོ་འདོད་པའི་བསམ་པ་དྲག་པོ་བྱུང་ནས།བདུད་རི་ཏི་འགོང་ཉག་གི་མཚོན་བདུད་ཀྱི་ཁྲམ་བམ་ནག་པོ་དེ།བུ་མོ་རེ་མ་ཏིས་བརྐུས་ནས།ལག་པ་གཡས་སུ་ཐོགས།མའི་མཚོན་གྱིས་གྲུག་གུ་སྔོན་དམར་དེ་བརྐུས་ནས་ལག་པ་གཡོན་ན་ཐོགས་ནས།ནམ་ཕར་ཕྱེད་ཚུར་ཕྱེད་ན་ཇོ་མོ་དུང་སྐྱོང་མའི་གན་དུ་བྲོས་ཏེ་ཕྱིན་ནས།ལུས་གཅེར་བུར་འདུག་པ་ལ།ཁྱིམ་བདག་རབ་སྦྱིན་གསལ་གྱི་བ་རྫི་མོ་དམངས་རིགས་མོ་བྱ་ཧ་མུ་ཞེས་བྱ་བ་དེ་རེ་ལྡེ་ནག་པོ་གྱོན་ནས་འདུག་པ་དང་ཕྲད།མོས་དམངས་རིགས་མོ་བསད་ནས་ཤ་ཟོས།པགས་པ་རྐེད་ལ་དཀྲིས།དེའི་གོས་རེ་ལྡེ་བཤུས་ནས་བདུད་མོ་ཉིད་གྱོན་ནས་ཕྱིན་ཙམ་ན།ལམ་ཁར་སྲིན་མོ་བུ་རྣ་ཤ་བའི་གསུར་ཁྲག།ནད་ཀྱི་རྫིང་བུ་ཅིག་ཡོད་པའི་ཁར་ཕྱིན་པ་ལས།བདུད་མོ་རེ་མ་ཏིས་སྐོམ་ནས་ཐོག་ཅིག་འཐུངས་ཙམ་ན།ཁ་རླངས་ལས་ནད་དུ་སོང་བས།མོའི་ཁ་རླངས་གར་ཕོག་པས་རིམས་ནད་བྱུང་ངོ་།དེར་མོ་རང་ཡང་ངོ་མཚར་སྐྱེས་ནས།སྔར་གྱི་དམངས་རིགས་མོ་བསད་པའི་རླུང་བུ་རྐེད་ལས་བཀྲོལ་ཏེ།ནང་ནད་ཀྱི་རྫིང་བུས་བཀང་ནས།ཁ་སྦྲུལ་གྱིས་བཅིངས་ཏེ།མཆན་ཁུང་དུ་སྦས་ནས།སེམས་ཅན་ལ་གདུག་པར་བྱ་བར་བསམས་ཏེ།ཕྱིན་ཙམ་ན།བཙན་སྐྱ་རྡོ་རྗེ་ཟླ་བ་དང་ཕྲད་པ་ན་དེ་བདུད་མོ་ཆེན་མོ་ཆགས་པ་སྤྱད་དགོས།རྔན་པ་ཡང་སྦྱིན་ཟེར་ནས།མོ་བཟུང་ནས་ཆགས་པ་སྤྱད་པའི་ཁུ་བ་ཐིགས་པ་གཅིག་འཛམ་བུའི་གླིང་དུ་བོ་བ་ནི་ཇོད་ཇི་དཀར་པོར་སོང་།wiaརྗེ་ཙོང་ཁ་པའི་དྲ་བ།

༼  ༣  ༽དེར་བཙན་སྐྱ་རྡོ་རྗེ་ཟླ་བའི་ལག་ན་ཤོད་རྡེའུ་དཀར་ནག་གང་ལ་བོར་བ་ཕུང་བར་བྱེད་པ་བདུན་ཡོད་པ་ལ།མོ་ལ་བྱི་རྔན་དུ་བྱིན་པ་དེ་བླངས་ཏེ།ལག་པ་གཡོན་དུ་བཟུང་ནས།གྲོང་ཁྱེར་སྦྲང་ལྡན་ཞེས་བྱ་བར་ཕྱིན་ཙམ་ན།རྒྱལ་པོ་སེང་གེ་རྩལ་ལ་བསོད་སྙོམས་བྱས་ཏེ།སྦྲང་རྩི་ལྷུང་བཟེད་གང་ཕུལ་ནས།སྦྲང་རྩི་ལག་ཏུ་ལེན་ཁར་ཕྱག་ཚང་བས་ཧུབ་བྱས་ནས་མོ་ལ་སྦྱིན།མོས་བླངས་ཙམ་ན།བར་སྣང་གི་ལྷ་རྣམས་ཀྱིས་བདུད་མོ།རྒྱལ་པོའི་ཁོལ་མོའི་ལྷག་མ་དང་ཁ་འཕྲོ་འཐུང་ངམ།ཆེ་བ་ཉམས་སོ་ཞེས་ཟེར་ཙམ་ན།བདུད་མོ་རེ་མ་ཏི་ཁྲོས་པས་ཡིད་འཁྲུགས་ཏེ།རྒྱལ་རིགས་ལ་དེར་རིམས་ནད་བཏང་ངོ་།།དེར་རྒྱལ་པོའི་དཀོར་ཟངས་ཀྱི་དྲ་བ་དགུ་ཕུལ་ནས་རིམས་བཅད་དོ།།དེ་ནས་ནག་མོ་རེ་མ་ཏི་དེས།རྒྱ་མཚོའི་འགྲམ་དུ་དུར་ཁྲོད་ཆེན་པོ་རོའི་ཚལ་དུ་སྔོན་གྱི་ཇོ་མོ་དུང་སྐྱོང་མའི་སྤྱན་སྔར་ཕྱིན་ཏོ།།དེ་ནས་དཔོན་གཡོག་གཉིས་འགྲོགས་ནས།སྲིད་པ་གསུམ་གྱི་སེམས་ཅན་ཟད་ཅིང་སྟོངས་པར་བྱེད་པའི་དུས་དེ་ཙམ་ན།ཇོ་མོ་དུང་སྐྱོང་མའི་ཞོན་པ་སྲིན་གྱི་བོང་བུ་དམར་གྭ་དང་།སྲིན་མོ་རྣ་ལ་དུན་རྩེའི་རྒོད་མ་ཟངས་ཀྱི་སོ་ཅན་གཉིས་ཆགས་པ་སྤྱད་པ་ལས།དྲེའུ་མོ་སྔོན་མོ་རླུང་གི་གཤོག་པ་ཅན་གཅིག་བྱུང་བ་དེ།རྒྱུ་མའི་འཐུར་ལ་ཟངས་ཀྱི་སྒ་བསྟད་ནས།ལྷ་མོ་དུང་སྐྱོང་མས་ཁོལ་མོ་རེ་མ་ཏི་ལ་ཞོན་པར་བྱིན།དེར་ཇོ་མོ་ནི་བོང་བུ་དམར་གྭ་ལ་ཞོན།ཁོལ་མོས་དྲེའུ་སྔོན་མོ་ལ་ཞོན།རྗེ་མོས་མི་ལྤགས་གོན་ཐོད་པ་དང་རལ་གྲི་ལག་ན་ཐོགས།ཁོལ་མོས་རེ་ལྡེ་ནག་པོ་གྱོན།ལག་ན་ཁྲམ་བམ་དང་།ཤོད་རྡེའུ་ཐོགས།དེ་ནས་ཤིན་དུ་མཐུ་རྩལ་ཆེ་སྟེ་སྐྱེ་བ་རྣམ་བཞིའི་སེམས་ཅན་ཡོ་ཟད་ཅིང་སྟོངས་པ་ཙམ་དུ་ཟོས་སོ།།འཇིག་རྟེན་གྱི་མཁའ་འགྲོ་མ།དཀར་མོའི་ཚོགས་དང་།སྔོན་མོ་དང་དམར་མོ་དང་།སེར་མོའི་ཚོགས་དང་།ལྷ་མོ་དང་།བདུད་མོ་དང་།སྲིན་མོ་དང་།བསམ་གྱིས་མི་ཁྱབ་པ་མང་པོ་ཡང་ལྷ་མོ་རྗེ་ཁོལ་གྱི་འབངས་བགྱི་ཟེར་ཞིང་བྲན་དུ་འོངས་སོ།།བརྒྱ་བྱིན་ཉོན་ཅིག་དུས་དེ་ཙམ་ན་ལྷ་མོ་དཔོན་གཡོག་གཉིས།བུད་མེད་ཀྱི་རང་བཞིན་དུ་གྱུར་པ་ཉིད་ཀྱིས།རྟག་པར་འདོད་པའི་འཁྲིག་པ་སྤྱད་པའི་ཆེད་དུ་ཁྱོ་དགུ་དང་སྦྱོར་བ་བྱེད་དེ།ཇེ་མོ་ལ་ཁྱོ་ལྔ་ཁོལ་མོ་ལ་ཁྱོ་བཞི་ཡོད་དེ།རྗེ་མོའི་ཁྱོ་ལྔ་ནི།གཟའ་རཱ་ཧུ་ལ།སྲིན་པོ་སྒྲ་ལྡན།གཤིན་རྗེ་མཱ་རུ་རྩེ།བདུད་ཆར་ཀ་ནག་པོ།།ཀླུ་ཀུནྡཱ་ལ་དང་ལྔ།ཁོལ་མོའི་ཁྱོ་བཞི་ནི།འབྱུང་པོ་དགེ་བ་དང་།བགེགས་བཱི་ན་ཡ་ཀ་དང་།གནོད་སྦྱིན་ཡཀྵ་ཀ་པ་ལ་དང་།རླུང་བཱ་བེ་དང་བཞིའོ།།དེ་ལྟར་དཔོན་གཡོག་གཉིས་ཀྱི་ཁྱོ་དགུ་ནི།ཉིན་པར་ནི་མཆན་ཁུང་གཡོན་དུ་བསྐུངས་ཤིང་སྦེད་ལ།མཚན་མོ་དུར་ཁྲོད་དུ་བསྐུང་ཞིང་སྦྱོར་བ་བྱེད་དོ།།བརྒྱ་བྱིན་ཉོན་ཅིག་དེ་ནས་ལྷའི་བུ་མོ་ལ་སྔོན་གྱི་ལས་འཕྲོས་འབྲེལ་ཞིང་དགེ་བ་སྤྱད་པའི་ཤུགས་ཀྱིས།བྱང་ཆུབ་ཀྱི་ཤིང་དྲུང་ན།བཅོམ་ལྡན་འདས་བཞུགས་པའི་སྤྱན་སྔར་ཕྱིན་ནས།ལྷ་མོ་དེས་བྱང་ཆུབ་མཆོག་ཏུ་སེམས་བསྐྱེད་དེ།བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་རང་གི་སྙིང་པོ་འདི་ཕུལ་ལོ།།ཏདྱ་ཐཱ།ཨོཾ་རུ་རུ་བེ་ཏིསྟ་བ་དོ་སི།རུ་རུ་རོ་རུ་བེསྟི་སྟ་བ་དོ་སི།ཙ་པ་ལ་ཨ་ཤུགྨེ་ཧཱུྃ་བྷྱོ་ཛཿཞེས་ཕུལ་ལོ།།ཁོལ་མོས་རང་གི་སྙིང་པོ་ཕུལ་བ།ཏདྱ་ཐཱ།ཨོཾ་རུ་རུ་བེ་རོ་རུ་ཧཱུྃ་ཏིསྟ་ཏོ་སི།རགྨོ་ཙིཏྟ་ཁ་རགྨ་དུན་བྷྱོ།མ་མ་ཏྲགྼཀྵ་ཁ་མུནྟྲ་བ་ཏྲ་རཀྴ་ཙིཏྟ་ཁ་རགྨ་དུྃ་ཧཱུྃ་བྷྱོ།རུ་ལུ་ས་མ་ཡ་ཕྲ་མ་མ་ཧཱ་སྟི་ཕྲ་བྷྱོ་ཞེས་ཕུལ་ལོ།།དེ་ནས་བྱང་ཆུབ་མཆོག་ཏུ་སེམས་བསྐྱེད་ནས་ལྷ་མོ་དཔོན་གཡོག་གཉིས་ཀྱིས་ཨ་སུ་རའི་བྲག་ཕུག་ཏུ་ཕྱིན་པ་ལས་བྲམ་ཟེ་མཆོག་སྲེད་བསྒྲུབ་པ་དང་ཕྲད་དོ།།ལྷ་མོས་ཁྱོད་འདི་ན་ཅི་བྱེད་བྱས་པ་ལ།བྲམ་ཟེ་མཆོག་སྲེད་ཀྱིས་སྨྲས་པ།སྔོན་ཁམས་འདི་ཉིད་ན་དགེ་སློང་བརྟན་པའི་སྡེ་དང་།དགེ་སློང་མ་དར་རི་སྡེ་གཉིས་ཁྲིམས་ཉམས་ཏེ་རྒྱལ་པོའི་ཆད་པས་བསད་དོ།།དེ་སྐྱེ་བ་འཕོས་པ་ནི།བདུད་ལྃང་འགེའུ་རི་དང་།རོ་ཤ་ཁ་འདར་གཉིས་སུ་གྱུར་ཏེ།ཡུལ་མི་ཅི་ཡོད་ཟད་པར་ཟོས་ནས།དེ་ནས་ང་ལ་ཟ་རེས་བབ་པས།ང་ནི་བདུད་འདུལ་བའི་ཕྱིར།ཡུམ་ཨེ་ཀ་ཛ་ཊི་རལ་གཅིག་མ།བསྒྲུབ་བོ་ཞེས་ཟེར་རོ།།དུང་སྐྱོང་མ་ན་རེ་འོ་ན་ངེད་དཔོན་གཡོག་ཀྱང་བསྒྲུབ་པར་བྱ་ན།ཡོན་ཏན་དེ་ལྟ་བུ་ཡོད་དམ་བྱས་ན།བྲམ་ཟེ་ན་རེ་ཁྱེད་གཉིས་དངོས་གྲུབ་ཅི་འདོད་པ་ཡིན།ལྷ་མོ་ན་རེ་ངེད་གཉིས་འདོད་པའི་ཁམས་ཀྱི་དབང་མོ་ཆེར་གྱུར་ནས།སངས་རྒྱས་ཀྱི་བསྟན་པ་བསྲུང་བའི་གྲུབ་པ་འདོད་བྱས་པ་ལ།འོ་ན་གྲུབ་པར་བྱའོ་ཞེས་ཟེར་ནས།བྲམ་ཟེ་དང་ལྷ་མོ་དཔོན་གཡོག་བསྒྲུབ་པ་བྱས་པས་ཡུམ་ཨེ་ཀ་ཛ་ཊི་ཞལ་མཐོང་ནས་གྲུབ་པ་ཐོབ་བོ།།ཡུམ་ཨེ་ཀ་ཛ་ཊིས།ལྷ་མོ་དུང་སྐྱོང་མའི་མིང་ནི།དཔལ་ལྷ་མོ་ནག་མོ་མ་ཧཱ་ཀཱ་ལི་ཞེས་བཏགས་སོ།།ཁོལ་མོའི་མིང་ནི་ཡཀྴ་རེ་མ་ཏི་ཞེས་བྱ་བར་བཏགས་སོ།།འདོད་ཁམས་འདུལ་བའི་དབང་མོ་ཆེར་དབང་བསྐུར་རོ།།མ་ཧཱ་ཀཱ་ལིས་ཀྱང་ཆོས་བསྐྱང་ཞིང་བསྟན་པ་བསྲུང་བར་ཁས་བླངས་སོ།།རང་གི་སྙིང་པོ་འདི་ཕུལ་ལོ།།ༀ་རུ་རུ་བེ་ཏིསྟ་བ་དོ་སི།རུ་རུ་རོ་རུ་བེ་ཏིསྟ་བ་དོ་སི།ཙ་བ་ལ་ཨ་ཤུག་མེ་བྷྱོ་ཛ༔རེ་མ་ཏིས་ཀྱང་།ཨོཾ་རུ་རུ་རོ་རུ་བེ་ཏིསྟ་བ་དོ་སི།རག་མོ་ཙིཏྟ་ཁ་རག་མ་ཧཱུྃ་བྷྱོ།མ་མ་ཏྲག་རག་ཤ་ཁ་མུན་ཏྲ་བ་ཏྲ་ཏྲག་རག་ཤ།ཙིཏྟ་ཁ་རག་མེ་རེ་མ་ཏི་ས་མ་ཡ་ཕྲ་མ་ཡ་ཕྲ་མ་མ་ཧཱ་ཏེ་ཕྲ་དུན་བྷྱོ།ཛ༔ཛ༔རུ་ལུ་བྷྱོ་ཞེས་ཕུལ་ལོ།།བདུད་ལྃ་ང་འགེའུ་རི་དང་རོ་ཤ་ཁ་འདར་བསྒྲལ་ལོ།།དེ་ནས་སའི་ལྷ་མོ་བརྟན་མས་ཀྱང་ནམ་གྲུ་མཆེད་བརྒྱད་ཀྱང་འབངས་སུ་ཕུལ་ལོ།།སྲིན་ཡུལ་དུ་དམག་དྲངས་པས།སྲིན་པོ་ཡགྴ་ཀོ་རེ་བསྒྲལ་ལོ།།བརྒྱ་བྱིན་ཉོན་ཅིག།དེ་ནས་འཕགས་པ་སྤྱན་རས་གཟིགས་ཀྱིས།དཔལ་རྟ་མགྲིན་དུ་སྤྲུལ་པའི་བསྒྲུབ་པ་བྱས་ཏེ།རྟ་མགྲིན་གྱི་ཞལ་མཐོང་ཞིང་གསང་བའི་གཟུངས་མ་བྱས་ཏེ།རྗེ་མོའི་མིང་དཔལ་ལྷ་མོ་ནག་མོར་བཏགས་སོ།།ཁོལ་མོའི་མིང་ནི་རྡོ་རྗེ་གློག་མ་སྲིན་དུ་མིང་བཏགས་སོ།།དེས་ཕྱག་རྒྱ་ཆེན་པོའི་དབང་བསྐུར་རོ།།ལས་ཀྱི་ལྷར་བྱིན་གྱིས་བརླབས་སོ།།དེའི་ཚེ་ན་དཔལ་ལྷ་མོ་ནག་མོས།དཔལ་རྟ་མགྲིན་ལ་སྙིང་པོ་མདོང་དུ་ཕུལ་ལོ།།བསྟན་པ་བསྲུང་བར་ཁས་བླངས་སོ།།དེ་ནས་སྔོན་གྱི་ཨུ་མ་དེ་བཱ་དང་རྣ་ལ་རྩེ་གཉིས་ཀྱང་།སྔོན་གྱི་བུ་མོ་གཉིས་ལ་སྲིན་ལག་རྩེ་ལ་ནུ་ཞོ་གླུགས་པས་བྲོས་ནས།དྲེད་མོའི་རལ་པས་གཡབ་མོས་འབོད་དེ།བུ་མོ་གཉིས་མའི་དྲུང་དུ་ཕྱིན་ཙམ་ན།དབང་བསྐུར་ཞིང་དམ་བསྒྲགས།བསྟན་པ་བསྲུང་བར་དབང་བྱིན་ཏོ།།འཁོར་ལོས་གྱུར་པའི་རྒྱལ་པོས་ཀྱང་རང་གི་རྩ་དང་ཁྲག་དང་ཁུ་བའི་མཆོད་པ་བྱས་ནས།ལྷ་དང་མིའི་རྒྱལ་སྲིད་ཕུལ་ནས།རྨ་བྱ་རིན་པོ་ཆེའི་གཤོག་པ་ཅན་སྤྱི་བོ་ན་ནོར་བུ་རིན་པོ་ཆེ་ཡོད་པ།ཇོ་མོ་ལ་ནོར་སྐལ་དུ་བྱིན་ནོ།།བྱ་དེ་མོ་ནག་མོ་སྤྱི་བོ་ན་ནོར་བུ་རིན་པོ་ཆེ་ཡོད་པ་ཅིག་ཁོལ་མོ་ལ་ནོར་སྐལ་དུ་བྱིན་ནས།ལྷ་མོ་རྗེ་ཁོལ་གཉིས་འཁོར་ལོས་སྒྱུར་བའི་རྒྱལ་པོས་བྱིན་པའི་རྨ་བྱ་དང་།དེ་མོ་ནག་མོ་གཉིས་གཏན་གྱི་ནོར་སྐལ་བྱེད་ཅིང་ཆགས།དེ་ནས་དཔལ་ལྷ་མོ་ནི་གསང་བའི་གནས་དུར་ཁྲོད་རོ་ཁང་ནག་པོའི་དབུས་མཱ་རུ་ཙེའི་སྒོ་འགྲམ་དུ།དཔལ་ཕྱག་ན་རྡོ་རྗེའི་ཧེ་རུ་ཀའི་དངོས་གྲུབ་སྒྲུབ་པའི་ཚེ།དཔལ་ཕྱག་ན་རྡོ་རྗེའི་དངོས་གྲུབ་གྲུབ་སྟེ།དཔལ་ཕྱག་ན་རྡོ་རྗེས་ལྷ་མོ་དཔོན་གཡོག་ལ་སྤྱི་བོ་གཙུག་ཏུ་དཔལ་རྟ་མགྲིན་གསང་བའི་དབང་བསྐུར།ལུས་ངག་ཡིད་གསུམ་ལ་ཁྲག་འཐུང་ཧེ་རུ་ཀའི་དབང་བསྐུར།ཐུགས་ཀྱི་དཔལ་བེའུ་རིགས་ལྔ་སངས་རྒྱས་ཀྱི་དབང་བསྐུར།སྐུ་སྟོད་ཀྱི་རྒྱན་དུ་འཕྲ་མེན་མ་བཅུ་དྲུག་གི་དབང་བསྐུར།ལྗགས་ཀྱི་དཀར་དམར་ལ་ལྕགས་ཀྱུ་གསང་བའི་དབང་བསྐུར་རོ།།གནད་མདོ་ཆེན་དྲུག་ཏུ་ཚོམ་བུ་གསང་བའི་དབང་བསྐུར་རོ།།གསང་བ་པདྨ་ལ་ཐིག་ལེ་ཡེ་ཤེས་ཤར་བའི་དབང་བསྐུར།རྡོ་རྗེ་ཕོ་ཉ་མོ་དྲུག་བཅུ་རྩ་བཞི་འཁོར་དུ་དབང་བསྐུར།པདྨ་གར་གྱི་དབང་ཕྱུག་ནི་སྤྲུལ་པ་དང་ཡང་སྤྲུལ་དུ་དབང་བསྐུར།དེའི་ཚེ་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་སོ།།དེ་ནས་དཔལ་ཕྱག་ན་རྡོ་རྗེས་ཇོ་མོའི་མིང་ནི་དཔལ་མ་ཧཱ་ཀཱ་ལི་ཞེས་བཏགས་སོ།།ཁོལ་མོའི་མིང་ནི་གནོད་སྦྱིན་ཤན་པ་ནག་མོ་རེ་མ་ཏི་ཞེས་བཏགས་སོ།།སངས་རྒྱས་ཀྱི་བསྟན་པ་བསྲུང་བར་གཉེར་གཏད་དོ།།དེ་ནས་དཔལ་ཕྱག་ན་རྡོ་རྗེ་ཉིད་ལ།དཔལ་ལྷ་མོས་རང་གི་སྙིང་པོ་ཕུལ་ཏེ།སངས་རྒྱས་ཀྱི་བསྟན་པ་དུས་རྟག་ཏུ་བསྲུང་བར་ཁས་བླངས་སོ།།དེ་ནས་དཔལ་ལྷ་མོ་དེ་མཐུ་དང་རྫུ་འཕྲུལ་བསམ་གྱིས་མི་ཁྱབ་པར་གྱུར་ཏོ།།འདོད་པའི་ཁམས་ཀྱི་དབང་ཕྱུག་མར་གྱུར་པའི་ཚེ།ལྷ་ཚངས་པས་ཉི་མའི་རྒྱན་ཕུལ་ཁྱབ་འཇུག་གི་ཟླ་བའི་རྒྱན་ཕུལ།རྣམ་ཐོས་སྲས་ཀྱིས་སེང་གེའི་རྣ་ཆ་ཕུལ།ནམ་མཁའི་ལྷ་བྲན་རྣམས་ཀྱིས་དྲིལ་བུའི་རྒྱན་ཕུལ།སྲིན་པོ་དང་ཤ་ཟ་རྣམས་ཀྱིས་ཐོད་ཕྲེང་དང་ཁྲག་དང་ཞག་གི་ཐིག་ལེ་ཕུལ་ལོ།།ཀླུ་དགའ་བོས་སྦྲུལ་གྱི་གདེངས་ཀ་ཕུལ།ལྷ་མོ་དེ་སྲིད་པ་གསུམ་ན་འགྲན་པའི་ཟླ་མེད་པར་གྱུར་ཏོ།།དེ་ནས་བརྒྱ་བྱིན་གྱིས་གསོལ་པ།ཀྱེ་བཅོམ་ལྡན་འདས་གསང་བའི་བདག་པོ།འདོད་པའི་ཁམས་ཀྱི་དབང་ཕྱུག་མ་འདི།དང་པོར་ལྷའི་བུ་མོར་གྱུར་པ་དང་།བར་དུ་སྲིན་པོའི་ཆུང་མར་གྱུར་པ་དང་།ད་ལྟར་འདོད་པའི་ཁམས་ཀྱི་དབང་ཕྱུག་མར་གྱུར་པ་འདི།སྔོན་གྱི་རྐྱེན་ཅི་ལས་གྲུབ་ལགས་ཞེས་གསོལ་པ་དང་།གསང་བའི་བདག་པོས་བཀའ་སྩལ་པ།བརྒྱ་བྱིན་ཉོན་ཅིག།ད་ལྟར་ལྷ་མོ་ནག་མོ་འདི་སྔོན་སངས་རྒྱས་འཁོར་བ་འཇིག་གི་བསྟན་པ་ལ་ལྷ་མོ་འོད་ཟེར་ཅན་དུ་གྱུར་ཏེ་དགེ་བ་བཅུ་ཤ་སྟག་སྤྱད་དོ།།དེ་ནས་སངས་རྒྱས་གསེར་ཐུབ་ཀྱི་བསྟན་པ་ལ་ལྷ་མོ་དཔལ་བསྟན་མ་ཞེས་བྱ་བར་གྱུར་ཏེ་ཞེ་སྡང་རང་ཁ་མར་སྤྱད་དོ།།དེ་ནས་སངས་རྒྱས་འོད་སྲུང་གི་བསྟན་པ་ལ་ལྷ་མོ་མཉྫུ་ཞེས་བྱ་བར་གྱུར་ཏེ།དུས་དེ་ཙམ་ན་ཤཱཀྱ་ཐུབ་པ་ནི་དགེ་སློང་དབང་ཕྱུག་དཔའ་བོ་ཞེས་བྱ་བར་གྲགས་སོ།།དགེ་སློང་དེ་ལ་ལྷ་མོ་མཉྫུས་མཆོད་གནས་བྱས་ཤིང་སྨོན་ལམ་གཅིག་ཏུ་བཏབ་བོ།།བརྒྱ་བྱིན་ཉོན་ཅིག།དེ་ད་ལྟ་ན་ནི་ལྷ་མོ་འདི་ལ་སངས་རྒྱས་གསུམ་གྱི་རིང་གི་རྣམ་པར་སྨིན་པ་ཤཱཀྱ་ཐུབ་པའི་བསྟན་པ་ལ་དུས་གཅིག་ཏུ་སྨིན་ནོ།།ལྷ་མོ་འདི་དང་པོར་མ་ཧཱ་དེ་བའི་བུ་མོར་སྐྱེས་པ་ནི་དང་པོར་དགེ་བ་སྤྱད་པའི་མཐུའོ།།བར་དུ་སྲིན་པོའི་ཆུང་མར་གྱུར་ནས་རང་ལྕེབ་པ་ནི་ཞེ་སྡང་སྤྱད་པའོ།།ཐ་མར་ད་ལྟར་འདོད་པའི་ཁམས་ཀྱི་དབང་ཕྱུག་མར་གྱུར་པ་ནི།སངས་རྒྱས་ཐམས་ཅད་ཀྱིས་དབང་བསྐུར་ནས་ཤཱཀྱ་ཐུབ་པའི་བསྟན་པ་བསྲུང་བ་ནི།སྔོན་ཤཱཀྱ་ཐུབ་པ་ལ་སྡིག་བཤགས་བྱས་ཀྱི་སྨོན་ལམ་བཏབ་བོ།།ཁོལ་མོ་རེ་མ་ཏི་སྔགས་ཀྱི་བསོད་ནམས་ལས་གྲུབ་པའོ།།མཁའ་འགྲོ་མ་མེ་ལྕེ་འབར་བའི་རྒྱུད་ལས་གླེང་བཞིའི་ལེའུ་སྟེ་དང་པོའོ།།wiaརྗེ་ཙོང་ཁ་པའི་དྲ་བ།

རྩོམ་སྒྲིག་པ།:མཁའ་ཚེ།